तोडकर यांच्या अंदाजानुसार, २० नोव्हेंबर पासून पुढील काही दिवसांमध्ये महाराष्ट्रातील हवामानात बदल दिसून येणार आहे. सध्या थंडीचा जोर जाणवत असला तरी, २३ नोव्हेंबर पासून वातावरणात हळूहळू ढगाळपणा वाढायला सुरुवात होईल. या बदलाचा परिणाम म्हणून, नाशिक आणि पुणे परिसरासह कोकण किनारपट्टी, घाटमाथ्यावर धुई आणि दाट धुके दिसून येईल. यासोबतच सोलापूर, दक्षिण सोलापूर, कोल्हापूर आणि कर्नाटकच्या काही भागांमध्ये हलक्या ते जोरदार सरी कोसळण्याची शक्यता वर्तवण्यात आली आहे.
२४ आणि २५ नोव्हेंबर या दोन दिवसांच्या कालावधीत काही ठिकाणी पावसाचा किरकोळ सटका अपेक्षित आहे, मात्र ही प्रणाली फारशी तीव्र नाही. मराठवाडा, खानदेश आणि विदर्भामध्ये वातावरण ढगाळ राहील, परंतु पावसाची व्याप्ती आणि तीव्रता फारच कमी असेल. हा पाऊस मध्यम ते हलक्या स्वरूपाचा (पेंडवणी) असण्याची शक्यता असून, केवळ २० ते ३० टक्के भागांमध्येच याची नोंद होईल.
