सोयाबीन हमीभाव नोंदणी मोबाइलवर करा दोनच मिनिटात.. पहा सोपी पद्धत ; राज्य सरकारने नाफेडमार्फत (NAFED) सोयाबीनची हमीभावाने खरेदी सुरू केली आहे. ३० ऑक्टोबरपासून ई-समृद्धी पोर्टलवर नोंदणी सुरू झाली असून, १५ नोव्हेंबरपासून प्रत्यक्षात खरेदीला सुरुवात झाली आहे. त्यामुळे शेतकऱ्यांना आपल्या सोयाबीनच्या विक्रीसाठी हमीभावाच्या केंद्रांवर किंवा मोबाइल वरून नोंदणी करणे आवश्यक आहे.
मोबाईल वर नोंदणी कशी करायची ?
सोयाबीनच्या हमीभाव केंद्रासाठी ऑनलाईन नोंदणी प्रक्रिया अत्यंत सोपी असून ती मोबाईलवरूनही करता येते. यासाठी शेतकऱ्यांनी सुरुवातीला ‘ई-समृद्धी ॲप’ आणि आधार प्रमाणीकरणासाठी आवश्यक असलेले ‘आधार फेस आरडी’ (Aadhaar Face RD) हे दोन ॲप्स आपल्या मोबाईलमध्ये इन्स्टॉल करणे गरजेचे आहे.
ॲपमध्ये मराठी भाषा निवडून, आपला मोबाईल क्रमांक टाकून ओटीपी (OTP) च्या साहाय्याने लॉगिन करावे लागते. त्यानंतर ‘नोंदणी’ या पर्यायावर क्लिक करून आपला आधार क्रमांक टाकावा लागतो. बायोमेट्रिक फिंगरप्रिंट मशीन उपलब्ध नसल्यास ‘चेहरा प्रमाणीकरण’ (Face Authentication) हा पर्याय निवडून नोंदणीची प्रक्रिया पूर्ण करता येते. हे प्रमाणीकरण यशस्वी झाल्यावर शेतकऱ्याचा संपूर्ण आधार तपशील आपोआप स्क्रीनवर दिसतो.
बँक तपशील आणि योजना निवड आधार प्रमाणीकरणानंतर, शेतकऱ्याला ‘बँकेचा तपशील’ भरणे आवश्यक आहे. यामध्ये खातेदाराचे नाव, बँकेचा आयएफएससी (IFSC) कोड आणि खाते क्रमांक दोनदा टाकून पासबुकच्या पहिल्या पानाचा फोटो अपलोड करावा लागतो. यानंतर ‘योजनेत सहभाग’ (Scheme Participation) या पर्यायावर क्लिक करून, ‘PSS सोयाबीन प्रोक्युअरमेंट खरीप २०२५’ ही योजना निवडावी लागते.
यानंतर आपला जिल्हा, तालुका, गाव आणि सर्व्हे क्रमांक नमूद करून ‘जमिनीचा तपशील’ (Land Details) भरावा लागतो. यामध्ये शेतकऱ्याने आपला ७/१२ उतारा (Satbara) अपलोड करणे आणि सोयाबीनची प्रत्यक्ष पेरणी केलेले क्षेत्र नमूद करणे बंधनकारक आहे.
अर्जाची अंतिम प्रक्रिया
जमिनीचा तपशील भरून झाल्यानंतर, शेतकऱ्याला आपल्या परिसरातील नाफेडचे (NAFED) जवळचे खरेदी केंद्र निवडावे लागते. सर्व माहितीची खात्री करून आणि आवश्यक कागदपत्रे (उदा. आधार कार्ड, पासबुक, ७/१२ उतारा) अपलोड केल्यानंतर अर्ज ‘सबमिट’ करावा लागतो. ही प्रक्रिया पूर्ण होताच, शेतकऱ्याला ‘शेतकरी नोंदणी यशस्वीरित्या सबमिट केली आहे’ असे नोटिफिकेशन आणि अर्जाचा आयडी (Application ID) मिळतो.
तसेच, नोंदणीची पीडीएफ (PDF) प्रत डाउनलोड करण्याची सोयही उपलब्ध होते. शेतकऱ्यांनी या सुविधेचा लाभ घ्यावा आणि ३० डिसेंबरपूर्वी आपली नोंदणी पूर्ण करून हमीभावाने सोयाबीनची विक्री करावी, असे आवाहन या करण्यात आले आहे.
