मालेगाव प्रकरणाची दुसरी बाजू ; तर आरोपीची हिंमत झाली नसती ; मालेगावजवळील डोंगराळे गावात एका साडेतीन वर्षाच्या चिमुकलीसोबत घडलेल्या अमानुष घटनेने संपूर्ण महाराष्ट्रात संतापाची लाट उसळली आहे. या प्रकरणातील आरोपी विजय खैरनार हा रोजंदारीवर काम करणारा बांधकाम मजूर होता. धक्कादायक बाब म्हणजे, त्याचे आई-वडील नसल्यामुळे माणुसकीच्या भावनेतून पीडित चिमुकलीचे कुटुंबीय त्याला जेवण देत असत आणि त्याची काळजी घेत असत.
आरोपीचे या कुटुंबाच्या घरी नियमित येणं-जाणं होतं. घरातल्याच एका व्यक्तीने एवढे क्रूर कृत्य करावे, हे गावकऱ्यांसाठी अत्यंत अविश्वसनीय आणि माणुसकीवरील विश्वास उडवणारे आहे. सुरुवातीला काही किरकोळ वादामुळे सुडाच्या भावनेतून हे कृत्य घडल्याचे बोलले जात होते, पण चिमुकलीच्या आईने त्यांच्यात कोणतेही भांडण नसल्याचे स्पष्ट केले आहे.
या घटनेमुळे डोंगराळे गाव शोकसागरात बुडाले आहे. गावकऱ्यांच्या मनावर खोलवर घाव बसला असून, घटनेनंतर अनेक घरांमध्ये तीन दिवस चूलही पेटली नाही, कारण अन्न गोड लागेनासे झाले आहे. गावातील महिला आणि मुलींमध्ये प्रचंड भीतीचे वातावरण आहे.
शाळेत जाण्याची वेळ झाली की मुली घाबरून जात असल्याने गेल्या चार दिवसांपासून विद्यार्थी शाळेत गेलेले नाहीत, परिणामी विद्यार्थी पटसंख्येवरही परिणाम झाला आहे. याशिवाय, चिमुकली राहत असलेल्या गल्लीच्या चौकातील सीसीटीव्ही कॅमेरे काही दिवसांपासून बंद होते. जर हे कॅमेरे सुरू असते, तर आरोपीला हे घृणास्पद कृत्य करण्याची हिंमत झाली नसती आणि चिमुकलीचा जीव वाचला असता, अशी भावना गावकरी व्यक्त करत आहेत.
डोंगराळे हे गाव मालेगाव शहरापासून सुमारे ३० किलोमीटर अंतरावर असून, आसपास कुठलीही पोलीस चौकी नाही, ज्यामुळे या परिसरात कायद्याचा वचक नसल्याचे दिसून येते. या भीतीदायक वातावरणामुळेच, या भागामध्ये तात्काळ पोलीस चौकी उभारण्यात येणार असल्याची घोषणा पालकमंत्री गिरीश महाजन यांनी केली आहे.
१६ नोव्हेंबरला घडलेल्या या घटनेचे तीव्र पडसाद महाराष्ट्रभर उमटले आहेत. आरोपीला कोर्टात आणणार हे कळल्यावर कोर्टाबाहेर संतप्त आंदोलकांनी मोठी गर्दी केली होती, ज्यामुळे आरोपीला न्यायालयात आणलेही गेले नाही. महाराष्ट्रातील जनतेला या नराधमी कृत्याचा प्रचंड संताप आहे आणि आरोपीला लवकरात लवकर कठोर शिक्षा व्हावी, अशी मागणी जोर धरत आहे.
