कांदा बंग्लादेशात निर्यात कधी सुरू होनार.. हालचालींना वेग ; बांग्लादेशमध्ये कांद्याचे दर वाढल्याने गेल्या आठवड्यापासून भारतातून आयातीला परवानगी दिली जाणार असल्याची चर्चा जोर धरू लागली होती. बांग्लादेशच्या वाणिज्य सल्लागारांनीही दर चढे राहिल्यास आयातीचा विचार केला जाईल, असे संकेत दिले होते.
या पार्श्वभूमीवर, काही व्यापाऱ्यांनी तातडीने ‘लेटर ऑफ क्रेडिट’ (LC) उघडून आयातीची तयारी सुरू केली. या घडामोडींमुळे भारतीय कांद्याच्या निर्यातीला पुन्हा सुरुवात झाली आहे का, असा प्रश्न उपस्थित झाला असतानाच, भारताच्या घोसडांगा सीमेवरून दोन कांद्याचे ट्रक बांग्लादेशात दाखल झाल्याची माहिती समोर आली आहे, ज्यामुळे निर्यातीला तात्पुरती का होईना सुरुवात झाल्याचे संकेत मिळाले आहेत.
स्थानिक बाजारात दरांची घसरण आणि गोंधळ
कांदा आयातीच्या या बातमीचा परिणाम थेट बांग्लादेशातील स्थानिक बाजारावर दिसून आला. आयातीच्या शक्यतेने धास्तावलेल्या स्थानिक व्यापाऱ्यांनी आणि साठेबाजांनी आपला साठा बाजारात विकायला काढला. यामुळे ढाक्याच्या श्यामबाजारसारख्या प्रमुख बाजारात कांद्याचे दर प्रति किलो ११०-१२० टकावरून घसरून ८०-९० टकावर (सुमारे २० टकाची घट) आले आहेत.
स्थानिक बाजारातील किमती अचानक कमी झाल्यामुळे, बांग्लादेश सरकारने कांदा आयातीचा अधिकृत निर्णय अद्याप घेतला नसला तरी, आयातीची तातडीची गरज आता राहिली आहे का, याबद्दल बाजारात मोठा संभ्रम कायम आहे.
भारतीय बाजारावरील परिणाम आणि शेतकऱ्यांसाठी सल्ला
बांग्लादेशात निर्यात सुरू झाल्यामुळे भारतीय बाजारावर मर्यादित स्वरूपाचा सकारात्मक परिणाम होण्याची शक्यता आहे, ज्यामुळे देशांतर्गत कांद्याच्या दरात २ ते ३ रुपयांची किरकोळ वाढ होऊ शकते. मात्र, सध्या भारतीय बाजारात नवीन कांद्याची आवक वाढत असल्याने एकूण दरांमध्ये घसरणीचा कल कायम आहे. त्यामुळे, भारतीय शेतकऱ्यांनी केवळ निर्यातीच्या बातम्यांवर अवलंबून न राहता, स्थानिक बाजारातील मागणी आणि दरांचा सखोल अभ्यास करूनच आपल्या मालाच्या विक्रीचा निर्णय घ्यावा, असा महत्त्वाचा सल्ला तज्ज्ञांनी दिला आहे.
दरम्यान, नोव्हेंबर अखेरीस किंवा डिसेंबरच्या सुरुवातीला श्रीलंकेसाठीही कांदा निर्यातीची शक्यता वर्तवण्यात येत आहे.
