दिटवाह चक्रीवादळ, या राज्यांना रेड अलर्ट ; मच्छिंद्र बांगर हवामान अंदाज ; डॉ. मच्छिंद्र बांगर यांच्या ताज्या हवामान अंदाजानुसार, सध्या हिंदी महासागरात तयार झालेल्या ‘डीटवाह’ चक्रीवादळाची स्थिती अधिक महत्त्वाची आहे. हे वादळ विशाखापट्टणमच्या दिशेने सरकत असून, त्याचा मोठा परिणाम तामिळनाडू, केरळ, दक्षिण कर्नाटक, तेलंगणा, रायलसीमा आणि आंध्र प्रदेश या पाच राज्यांवर होणार आहे. किनारी पट्ट्यांमध्ये अतिवृष्टी किंवा भयंकर पावसाची शक्यता असल्याने या राज्यांसाठी रेड अलर्ट जारी करण्यात आले आहेत. मात्र, महाराष्ट्रातील नागरिकांसाठी दिलासादायक बाब म्हणजे या चक्रीवादळाचा महाराष्ट्राला कोणताही धोका नाही आणि राज्यातील हवामानावर याचा थेट परिणाम होणार नाही.
मागील आठवड्यात (ऑक्टोबर १ ते नोव्हेंबर २६ या पोस्ट-मान्सून कालावधीत) महाराष्ट्रात पावसाची स्थिती संमिश्र राहिली आहे. सरासरीपेक्षा जास्त पाऊस केवळ रत्नागिरी, सिंधुदुर्ग, पालघर, नंदुरबार आणि धुळे या जिल्ह्यांमध्ये नोंदवला गेला, तर उर्वरित ठिकाणी विशेष पावसाची नोंद झालेली नाही. डिसेंबर महिन्याच्या अखेरपर्यंतच्या (जवळपास २५ डिसेंबरपर्यंत) दीर्घकालीन अंदाजानुसार, उत्तर भारतात ‘वेस्टर्न डिस्टर्बन्स’ (WD) वाढण्याची शक्यता आहे.
