पीएम किसानचा २१ वा हप्ता १९ नोव्हेंबरला..! करा हे छोटसं काम ; पीएम किसान सन्मान निधी योजनेचा २१ वा हप्ता १९ नोव्हेंबर २०२५ रोजी, म्हणजेच येत्या बुधवारी, पात्र शेतकऱ्यांच्या बँक खात्यात जमा होण्याची तयारी पूर्ण झाली आहे. केंद्र शासनाच्या माध्यमातून मोठ्या प्रतीक्षेनंतर हा हप्ता वितरित करण्यासाठी मंजुरी मिळाली असून, १६ नोव्हेंबर २०२५ रोजी हप्ता वितरणासाठी आवश्यक असलेल्या सर्व प्रशासकीय प्रक्रिया पूर्ण होत आहेत.
पात्र असलेल्या शेतकऱ्यांची अंतिम लाभार्थी यादी (Beneficiary List) तयार झाली आहे आणि राज्य शासनाच्या स्तरावर ‘आरएफटी’ (RFT – Request for Transfer) साईन करण्यात आले आहेत. लवकरच पात्र शेतकऱ्यांचे ‘एफटीओ’ (FTO – Fund Transfer Order) जनरेट होण्यास सुरुवात होईल. यासोबतच, सध्या पीएम किसानचे पोर्टल देखील तांत्रिक देखभालीसाठी (Maintenance) घेण्यात आले असून, त्यावर डेटा अपडेट करण्याचे महत्त्वपूर्ण काम सुरू आहे.
या हप्त्याच्या वितरणापूर्वी केंद्र सरकारने योजनेच्या नियमांनुसार लाभार्थ्यांचे भौतिक सत्यापन (Physical Verification) करण्याची मोहीम राबवली आहे. पीएम किसान योजनेनुसार ‘एक कुटुंब, एक लाभ’ (पती, पत्नी आणि १८ वर्षांखालील एक अविवाहित मूल) हा नियम आहे. या नियमांचे उल्लंघन करत एकाच कुटुंबातील एकापेक्षा जास्त सदस्य लाभ घेत असतील, तर अशा अपात्र लाभार्थ्यांना वगळण्यात येत आहे. तसेच, जमिनीच्या नोंदींमध्ये किंवा इतर बाबींमध्ये संशयास्पद असलेले लाभार्थी देखील वगळले जात आहेत. यामुळे राज्यात अंदाजे दोन लाखाहून अधिक अपात्र लाभार्थी वगळले जाण्याची शक्यता आहे. तसेच ज्या पात्र शेतकऱ्यांचे मागील २० वा किंवा १९ वा हप्ता सत्यापन प्रक्रियेमुळे थांबला होता, त्यांचे थकीत हप्ते देखील या २१ व्या हप्त्यासोबत वितरित केले जाणार आहेत.
हे काम करा…
सर्व शेतकऱ्यांसाठी सर्वात महत्त्वाचे आणि सोपे काम म्हणजे आपला मोबाईल क्रमांक अद्ययावत (Update) करणे. अनेक शेतकऱ्यांना हप्ता जमा झाल्याची किंवा योजनेसंबंधित इतर महत्त्वाची माहिती एसएमएसद्वारे (SMS) मिळत नाही, कारण त्यांच्या पीएम किसान खात्याशी जुना किंवा बंद झालेला मोबाईल क्रमांक जोडलेला असतो. हे टाळण्यासाठी शेतकरी पीएम किसान पोर्टलवर किंवा पीएम किसान ॲप्लिकेशन (PM Kisan App) द्वारे अगदी कमी वेळेत आपला मोबाईल नंबर बदलू शकतात.
यासाठी आपला आधार क्रमांक किंवा रजिस्ट्रेशन क्रमांक वापरून माहिती शोधा आणि नवीन मोबाईल नंबर टाकून ओटीपीद्वारे (OTP) तो सत्यापित (Verify) करा. हा क्रमांक अद्ययावत केल्यास, योजनेसंदर्भातील सर्व नवीन सूचना आणि अपडेट्स शेतकऱ्यांना वेळेवर मिळत राहतील. पात्र लाभार्थ्यांनी ही छोटीशी पण महत्त्वाची प्रक्रिया त्वरित पूर्ण करून घ्यावी.
