Maharashtra Weather Update : थंडी जाणार. पाऊस येणार? काय आहे पुढील काही दिवसांसाठी हवामानाचा अंदाज?
पुणे शहर आणि परिसरात थंडीचा कडाका वाढलेला असताना आता हवामानात बदल होण्याची चिन्हे आहेत. २१ ते २४ नोव्हेंबरदरम्यान पुण्यासह मध्य आणि दक्षिण महाराष्ट्रात आकाश ढगाळ राहून किमान तापमानात वाढ होण्याचा, तसेच काही ठिकाणी हलक्या पावसाचा अंदाजही हवामानतज्ज्ञांनी वर्तवला आहे.
निरभ्र आकाश, कोरडे वातावरण, उत्तरेकडून येणाऱ्या थंड वाऱ्यांमुळे मध्य महाराष्ट्रातील किमान तापमानात गेल्या काही दिवसांपासून सातत्याने घट होत आहे. त्यामुळे शहर आणि परिसरातही गुलाबी थंडीचा अनुभव येत आहे. प्रामुख्याने दिवसाच्या तुलनेत रात्री, पहाटे थंडीचा कडाका पुणेकरांनी अनुभवला आहे. त्यामुळे अनेक ठिकाणी रात्रीच्या वेळी शेकोट्या पेटल्याचेही चित्र दिसून आले. मात्र, आता हवामानात काही काळासाठी बदल होण्याची चिन्हे आहेत.
ज्येष्ठ हवामानतज्ज्ञ अनुपम कश्यपी यांनी दिलेल्या माहितीनुसार, बुधवारपासून तापमानात वाढ होऊ शकते. दक्षिण, मध्य महाराष्ट्रात आकाश ढगाळ होऊन २२ ते २४ डिसेंबर दरम्यान सांगली, कोल्हापूर, सोलापूर, सिंधुदुर्ग, रत्नागिरी अशा काही ठिकाणी हलक्या पावसाची शक्यता आहे. बंगालच्या उपसागरात निर्मिती होत असलेल्या कमी दाब क्षेत्राची तीव्रता वाढून, त्याच्या वाटचालीमुळे राज्याच्या हवामानावर परिणाम होऊ शकतो. त्यामुळे उत्तरेकडून येणाऱ्या थंड वाऱ्यांचा प्रवाह काही काळासाठी खंडित होऊन थंडीची तीव्रता कमी होऊ शकते.
यंदाच्या हंगामातील नीचांकी तापमानाची नोंद
यंदाच्या हिवाळ्यातील आतापर्यंतचे नीचांकी तापमान मंगळवारी नोंदवले गेले. हवामान विभागाने दिलेल्या माहितीनुसार शिवाजीनगर येथे ९.५, तर पाषाण येथे ९.३ अंश सेल्सियसची नोंद झाली.
जास्त पावसानंतर जास्त थंडी
यंदा मोसमी वारे मे महिन्यातच दाखल झाले. तेव्हापासून मोसमी वारे माघारी जाईपर्यंत पाऊस होता. एकूण पावसाच्या हंगामात सरासरीपेक्षा जास्त पावसाची नोंद झाली. दिवाळीच्या सुमारास अरबी अमुद्र आणि बंगालचा उपसागर अशा दोन्ही ठिकाणी कमी दाब क्षेत्राची निर्मिती होऊन राज्यात पाऊस पडला होता. नोव्हेंबरच्या पहिल्या आठवड्यापासून राज्यात गारवा निर्माण होऊ लागला. तर गेल्या काही दिवसांत मराठवाडा, मध्य महाराष्ट्र, विदर्भात कडाक्याची थंडी आहे. त्यामुळे जास्त पावसानंतर आता जास्त थंडीही अनुभवायला मिळत आहे. हवामान शास्त्रज्ञांच्या अंदाजानुसार ‘ला निना’ या हवामान घटकामुळे थंडीचे प्रमाण जास्त असू शकते.
